"સચિને ઈન્સ્ટાગ્રામ પર ફોટો પોસ્ટ કર્યો, ગાંગુલીએ એવી કોમેન્ટ કરી કે ચાહકોને મોજ પડી ગઈ"

સચિન તેંડુલકર અને સૌરવ ગાંગુલી ફક્ત ભૂતપૂર્વ સાથી ખેલાડી જ નથી પરંતુ બંને વચ્ચે મિત્રતા પણ ઘણી ગાઢ છે. તેઓ અવાર-નવાર એકબીજા સાથે મજાક મસ્તી કરતા રહે છે. તાજેતરમાં જ સચિને પોતાના સોશિયલ મીડિયા એકાઉન્ટ પર પોતાની એક તસવીર પોસ્ટ કરી છે જેના પર ભારતીય ક્રિકેટ કંટ્રોલ બોર્ડના પ્રમુખ સૌરવ ગાંગુલીએ મજાકિયા અદાંજમાં કોમેન્ટ કરી છે. આ બંનેની વાતનો ક્રિકેટ પ્રેમીઓએ પણ આનંદ ઉઠાવ્યો છે.

સચિને ગુરૂવારે પોતાના ઈન્સ્ટાગ્રામ પર સાઉથબેંક મેલબોર્નથી એક તસવીર પોસ્ટ કરી હતી. તેણે તસવીર સાથે લખ્યું હતું કે 'તડકાનો આનંદ માણી રહ્યો છું' સચિનની આ પોસ્ટ પર ભૂતપૂર્વ સુકાનીએ ટિપ્પણી કરી હતી કે, કોઈ કોઈનું નસીબ ઘણું સારૂં છે...રજાઓ માણી શકે છે.

સોશિયલ મીડિયા પર બંને વચ્ચેનો આ સંવાદ ઘણો વાઈરલ થયો છે અને ક્રિકેટ પ્રેમીઓએ પણ તેના પર ટિપ્પણી કરી હતી. હકિકતમાં સચિન ઓસ્ટ્રેલિયામાં એક ઉમદા કામ માટે ગયો છે અને આ દરમિયાન તેણે પોતાની રજાનો પણ આનંદ માણ્યો હતો. સચિન બુશફાયર ક્રિકેટ બેશ માટે 10 મિલિયન ડોલરની રકમ એકઠી કરી છે.

સચિને બુશફાયર ક્રિકેટ બેશમેચ દરમિયાન બ્રેકમાં ઓસ્ટ્રેલિયાની સ્ટાર ઓલ-રાઉન્ડર એલીસે પેરી અને એનાબેલ સધરલેન્ડની એક ઓવરનો સામનો કર્યો હતો. 10-10 ઓવરની આ મેચ ઓસ્ટ્રેલિયાના જંગલોમાં લાગેલી આગથી અસરગ્રસ્ત થયેલા લોકોની મદદ માટે ક્રિકેટ ઓસ્ટ્રેલિયા દ્વારા યોજવામાં આવી હતી. આ મેચમાં બ્રાયન લારા, કર્ટની વોલ્શ, યુવરાજ સિંહ અને વસીમ અકરમ જેવા દિગ્ગજ ખેલાડીઓ પણ હતા. રિકી પોન્ટિંગ ઈલેવન ટીમે આ મેચમાં એડમ ગિલક્રિસ્ટ ઈલેવનને એક રને પરાજય આપ્યો હતો."